Пайғамбарлар мен әулие-әнбиелерді үлгі ететін бесік жырынан үзінді

Пайғамбарлар мен әулие-әнбиелерді үлгі ететін бесік жырынан үзінді

02.11.2019 Off 180

OQSYZ.Пайғамбарлар, әулие-әнбиелер мен олардың ізгі істері өнеге етілетін бесік жыры:

Менің балам осы ма?
Басында бақыт құсы ма?
Ғайып ерен, қырық шілтен
Бөбегімнің досы ма?
Әлди, әлди, әлди-ай.

Лә иләһә иллалла,
Иллаллада пайда бар.
Мұхамбеттің үмбеті
Осындай бала қайда бар?
Әлди, әлди, әлди-ай.

Балам менің Жүсіптей
Болар ма екен келбетті?
Ажарың айдай толсын деп,
Иллалалап тербеттім
Әлди, әлди, әлди-ай.

Ер Дәуіттей қайратты
Ұста болар ма екенсің?
Дос жаранға айбатты
Нұсқа болар ма екенсің?
Әлди әлди әлди-ай.

Тақ Сүлеймен нәбидей
Патша болар ма екенсің?
Халқың үшін қамданып,
Атқа қонар ма екенсің?
Әлди әлди әлди-ай.

Қазығұртқа кеп тоқтаған,
Нұхтай болар ма екенсің?
Отбасыма орнаған
Құттай болар ма екенсің?
Әлди әлди әлди-ай.

Ымыранның ұлы Мұсадай,
Досы болғын Қүдайдың.
Қызыр ерсің қасыңа
Тәңірден соны сұраймын.
Әлди әлди әлди-ай.

Ғайсадай нұр бітімің
Салих болар ма екенсің?
Хақтың жолын таныған
Ариф болар ма екенсің?
Әлди әлди әлди-ай

Әзірет Мұхаммед-
Сәруары болған ғаламның
Рахматының тамшысы-
Нұрынан сен жаралдың.
Әлди, әлди, әлди-ай.

Төрт шадияр-достарың,
Жадыңа тоқы, құлыным.
Нұрланып иман-бостаның.
Жүзіңнен тамсын шырының.
Әлди әлди әлди-ай.

Ғайып ерен, қырық шілтен,
Тоқсан тоғыз мың машайық.
Сексен сегіз серулер,
Әлдилетіп қосайық.
Әлди әлди әлди-ай.

Әлди бөпем, құт бөпем,
Бұл сөзімді ұқ, бөпем.
Лә иләһә иллала
Көкейіңе тұт бөпем
Әлди әлди әлди-ай.

Құлыншағым, құлыным,
Ұзақ болсын ғұмырың.
Құлағыңа құй бәрін,
Әжеңнің айтқан жырының,
Әлди әлди әлди-ай.

Айналайын, бөбегім,
Айналайын, өбемін.
Азамат боп өссін деп,
Ақ бесікке бөледім.
Әлди әлди әлди-ай.

Періштең сені тербетер,
Ботам менің ер жетер,
Еркек тоқты құрмалдық,
Игілік, қайыр елге етер.
Әлди әлди әлди-ай.

Әлдилетіп, тербетіп,
Бір Құдайды жыр етіп.
Әжең тыным таппайды,
Өссін деп сен ер жетіп.
Әлди әлди әлди-ай.

Отбасы хрестоматиясы,
Әлдиден эпосқа дейін атты кітаптан, 16- шы бет