Отырарлық жастар Түркістанды түлетуге кірісті

Отырарлық жастар Түркістанды түлетуге кірісті

04.02.2019 Off 386

OQSYZ.Жуырда ғана Елбасы Нұрсұлтан Әбішұлы Назарбаев биылғы жылды “Жастар жылы” деп жариялағаны белгілі. Облыс орталығы атанған Түркістанды түрлентіп, қаншама құпиясы қойнауында бүркелген түркі жұрты кие тұтқан қасиетті мекеннің тарихи іздерін анықтау, жаңғырту  бағытында Мәдениет және спорт министрлігінің қолдауымен “Әзірет Сұлтан” мемлекеттік тарихи-мәдени қорық-музейіне қарасты Күлтөбе қалашығы маңайында археологиялық қазба жұмыстары басталып кеткені белгілі.
Осы орайда,  Мәдениет және спорт министрлігіне қарасты Қазақ ғылыми – зерттеу мәдениет институты мен Отырар аудандық Жастар орталығы бірлесіп алғашқы боп “Жастар жылына” орай бірқатар жұмыссыз жастарды жұмыспен қамтыды.


-“Елбасымыз жариялаған Жастар жылына қолдау білдіру, аудан жастарын жұмыспен қамту, баспана мәселесін шешу, әлеуметтік жағдайларына қолдау көрсету мақсатында аудан әкімі Ерлан Қуанышұлының қатысуымен  жастармен жұмыс жүргізу жөніндегі кеңес мәжілісінің кезектен тыс отырысы өткен болатын. Аталған мақсатта қызу жұмыстар басталып та кетті. Ауданның 20-ға жуық жастарын киелі Түркістан қаласындағы археологиялық қазба жұмыстарына алып келдік. Алдағы уақытта да бұл орталықпен тығыз қарым-қатынас орната отырып, жас мамандар қажет болып жатса қамтамасыз етуге күш салатын боламыз. Ауданда қазір жұмыссыз жастар тізімі даярлануда. Түркістанды түлетуге қолдау білдіре отырып,  тиісінше басқа да салаларға қажетті жастарды түгелдей жіберуге атсалысамыз”,-деді Отырар аудандық Жастар ресурстық орталығының директоры Дәурен Ақсақалов.

Бүгінгі таңда,  Күлтөбеде еңбек етіп жатқан 80-нен аса археологтың басым бөлігін жастар құрайды.
-“Отырар мен Түркістан бір-біріне жақын, әрі тарихы да тығыз байланысты. Елбасы Нұрсұлтан Әбішұлы Назарбаевтың тарихи шешімі Жастар жылымен ұштасуы да айтулы жағдай. Біз Отырар ауданының жастары тарихи жұмыстарға өзіміз белсене кірісіп, еңбегіміз арқылы қолдау білдіретінімізге қуаныштымыз. Көне қалаларды анықтау үшін ұқыпты, әрі зейінді болу басты орында.Жұмыс өте қызықты екен”,-дейді отырарлық жас археолог Әли Сералиев.
Алдағы уақытта Отырар ауданының әкімі Ерлан Айтахановтың бастамасымен аудандағы жастардың еңбекке қабілеттігі ескеріле отырып, Түркістандағы қарқынды жұмысқа қажетінше жұмылдырылмақ.

Айта кетсек, қаңтар айының 17 жұлдызынан бастап археологиялық қазба жұмыстарын бастаған Қазақ ғылыми – зерттеу мәдениет институты қоқан және қазақ хандығы тұсындағы үйлердің орнын тауып, жұмысын қарқынды жүргізуде. Анықтау, зерттеу арқылы Ясауи өмір сүрген кезеңдердегі тарихтың жаңа парақтарын ашуға бағыт алған археологиялық топ алдағы уақытта толыға түспек.